Sunday, November 24, 2013

இரண்டாம் உலகம் - Universe or Multiverse ?

இரண்டாம் உலகம் திரைப்படம், Multiverse theory, Membrane theory போன்றவற்றை அடிப்படையாக் கொண்ட திரைப்படம். படத்தில், தியரி பற்றி பெரிய அறிமுகம் ஏதும் கொடுக்கப்படவில்லை. Michio kaku மற்றும் ஐங்ஸ்டைன் சொல்லிய கோட்பாட்டை டைட்டிலில் எளிமையாகப் போட்டார்கள். முக்கியமாக ஐங்ஸ்டைன் முடிக்காமல்( Theory of everything ) விட்டுப்போன கோட்பாடுகளில் ஒன்று. அதில் ஆர்வம் கொண்ட Michio kaku பின்னர் தானும் ஆய்வில் இறங்கினார்.

நம்மைப் போலவே நிறைய உலகங்கள் இருக்கின்றன, அதில் நம்மைப் போலவே பலர் இருப்பார்கள் என்கிற தியரி. உதாரணமாக, நீங்கள் இதை ஆர்வமாகப் படித்துக்கொண்டிருக்கிறீர்கள், நீங்களே வேறொரு உலகில் இருந்து திபெத்திய போராட்டம் பற்றி வாசித்துக்கொண்டிருக்கலாம். இன்னொரு உலகில், இணையமே இன்னமும் அறிமுகமாகாமல் இருக்கலாம். இன்னமும் நிறைய சாத்தியக்கூறுகள் இருக்கிறது.அங்கிருப்பவர்கள் தமிழை மொழியாகக் கொண்டவர்களாகவும் இருக்கலாம். அங்கு இயற்பியல் விதிகள் வேறுமாதிரியாகவும் இருக்கலாம்.

நம்மைப் போன்றவர்களை, அவர்களின் உலகை பார்க்க முடியாமல் இருப்பதற்கு பல காரணங்கள் இருக்கிறது. சூரிய குடும்பத்தில் பூமி இருப்பது போல ,பல்லாயிரக்கணக்கான சூரிய குடும்பங்கள் சேர்ந்தது தான் பால்வீதி. பல லட்சம் பால்வீதிகள் சேர்ந்தது தான் நம் அண்டம்(Universe). நம்முடைய அண்டம் போல பல இலட்சம் அண்டங்கள்(Multiverse) இருக்கலாம் என்கிறார்கள். அதாவது ஒளி கூட சென்றடையாத தூரத்தில் இந்த சாத்தியக்கூறுகள் இருக்கலாம். நம்மைப் போன்றவர்கள் இருக்கலாம். தொடர்ந்து பிங் பாங்(Big Bang) வெடிப்பு நிகழ்ந்துகொண்டிருக்கிறது, ஒவ்வொரு நொடியும் புதுசாக ஒவ்வொரு அண்டம் உருவாகிக்கொண்டிருக்கிறது என்கிறது தியரி.

இப்படி மற்ற உலகங்களைப் பார்க்க முடியாமல் இருப்பதற்கு இன்னொரு காரணமும் சொல்லப்படுகிறது. உதாரணமாக, நம்மால் முப்பரிமாண உலகையே காண முடிகிறது.ஆனால் மொத்தம் பதினொரு பரிமாணங்கள் இருக்கிறது என்கிறது எம் தியரி. அதனால் நம்மைச் சுற்றியே அந்த உலகங்கள் இருப்பதற்கான சாத்தியங்கள் அதிகம்.ஆனால் நம் புலன்களுக்குத் தெரியாது.

இப்படியொரு குழப்பமான தியரியை, திரையில் இயன்றளவு எளிமைப்படுத்தி கொடுத்திருக்கிறார் இயக்குனர் செல்வராகவன்.

முக்கியமாக தமிழ் சினிமா இரசிகர்களுக்கு ஒரு Science fiction + காதல் கலந்த கதையை கொடுக்க எண்ணியதைப் பாராட்ட வேண்டும். இரண்டு உலகங்களில் கதை நகருகிறது. ஏராளமான உலகங்களில் கதை நகர்ந்துகொண்டிருக்கலாம். திரையில் இரண்டு உலகங்கள் தான் காட்டப்படுகிறது.

இப்படி இரண்டு வேறுபட்ட உலகத்தை இணைப்பது என்பது சவாலான விடயம். நம்மவர்கள் நம்பமாட்டார்கள் எனத் தெரிந்துதான், 'கடவுள்' என்று ஒரு பாத்திரத்தை அறிமுகப்படுத்தியிருக்கவேண்டும். முக்கியமாக, இதில் கடவுள் ஒரு பெண். செல்வராகவன் மட்டும் தான் அப்படி சிந்திப்பார்.

இந்த இரண்டு உலகங்களிலும் ஒரே நேரத்தில் கதை நகர்ந்துகொண்டிருக்கும் போது, எதிர்பாராத சில விஷயங்கள் நடக்கிறது. பின்னர் இந்த இரண்டு உலகங்களையும்  தொடர்புபடுத்தி கதை எப்படி நகருகிறது என்பதை திரையில் பார்த்து தெரிந்துகொள்ளுங்கள்.

பெண்களை தைரியமானவர்களாகவும், புத்திசாலியாகவும் காட்டும் இயக்குனர்களுள் செல்வராகவனும் ஒருவர். இந்தப் படத்திலும் கதாநாயகி பாத்திரத்துக்கு கூடுதல் பெறுமதி உண்டு. எல்லோரையும் விட,  இந்தப் படத்தில் அனுஷ்காவின் நடிப்பு  சிறப்பாக இருந்தது.

செல்வராகவன் திரைப்படங்களில் வரும் காட்சிகளுக்கு என்று தனித்துவம் உண்டு. காதல் என்றால் என்னவென்று தெரியாத உலகத்தில் வாழும் இருவருக்கிடையே ஏற்படும் காதலை சிறப்பாகக் காட்டியிருப்பார். 

முக்கியமாக CG தொழில்நுட்பத்தை இயன்றளவு சிறப்பாகப் பயன்படுத்தியிருக்கிறார்கள். ஆயிரத்தில் ஒருவன் திரைப்படத்துக்குப் பணி புரிந்த அதே அணி. இதில் இன்னும் சிறப்பாக செய்திருக்கிறார்கள். ஒளிப்பதிவாளர் ராம்ஜியின் உழைப்பில் இரண்டு உலகங்களும் மிகவும் அழகு.

மன்னவனே, கனிமொழியே, என் காதல் தீ பாடல்கள் சிறப்பாக இருந்தது. பல தடவைகள் கேட்டிருந்தாலும், காட்சி அமைப்போடு பார்க்கும்போது கூடுதல் அழகு. இதற்கு வைரமுத்துவின் நல்ல தமிழ் வரிகளும் ஒரு காரணம். சில இடங்களில் அனிருத்தின் பின்னணி இசை அவ்வளவாகக் கவரவில்லை.

சில இடங்களில் தியரிகளை விளக்க சிரமப்பட்டது தெரிகிறது. இன்னொரு உலகம் இருந்து, அதில் இந்தப் படத்துக்கு சுஜாதா வசனம் எழுதியிருந்தால் எப்படியிருக்கும் என்று யோசித்தேன். தமிழ் இரசிகர்களையும் திருப்திப்படுத்த வேண்டும் என முயன்று சில இடங்களில் சுதப்பியிருக்கிறார் என நினைக்கிறேன்.

மற்றபடி இது தமிழ் சினிமாவில் புதியதொரு முயற்சி. மற்றவர்களும் தைரியமாக இதுபோன்ற கதைகளை எடுத்துச் செய்ய இத்திரைப்படம் தூண்டினால் நல்லது. காதலை எந்தத் தளத்தில், எந்த வடிவில் சொன்னாலும் அது புதியது தான்.' உலகில் காதல் பழையது, உற்ற பொழுதே புதிய ' என்ற வைரமுத்துவின் வரிகள் போல.

தமிழ்சினிமாவில் இதுபோன்ற திரைப்படங்கள் நிறைய வரவேண்டும். இயக்குனர்கள், திரைக்கதை ஆசிரியர்கள், எழுத்தாளர்கள் மற்றும் இரசிகர்களின் கிரியேட்டிவிட்டிக்கு சுதந்திரமான தளத்தைக் உருவாக்கிக் கொடுக்கும் படங்கள் இவை.

“Logic will get you from A to Z; imagination will get you everywhere.” - ஐங்ஸ்டைன். இந்தப் படத்தையும் உங்கள் கற்பனைத் திறனுக்கே சமர்ப்பித்துவிடுங்கள்.

Saturday, November 23, 2013

வைரமுத்து : ஈக்கி போல நிலவடிக்க!

ஈக்கி போல் நிலவடிக்க - கண்ணே
இந்திரனார் பந்தாட,

இந்திரனார் அடித்த பந்தை
எதிர்த்தடிக்க வந்த கண்ணோ" 


இதுவொரு தாலாட்டுப் பாடலின் ஒரு பகுதி. இதே வரிகளை 'யாரோ யாரோடி' பாடலில் வைரமுத்து அவர்கள் பயன்படுத்தியிருப்பார். அதுவொரு கிராமிய சூழலில் இடம்பெறும் பாடல் என்பதால், இந்த வரிகள் பயன்படுத்தப்பட்டிருக்கிறது. இணையமெங்கும் பிழையாக எழுதப்பட்டுள்ள வரிகள். இந்தப் பாடல் வரிகளும் அவ்வளவு தெளிவாகக் கேட்காததும் ஒரு காரணமா இருக்கலாம்.பெரும்பாலும் எல்லோருக்குமே பிடித்த பாடல் இது.



ஈக்கி போல் நிலவடிக்க
இந்திரனார் பந்தடிக்க
அந்தப் பந்தை
எதிர்த்தடிப்பவனோ சொல்லு!


ஈக்கில் என்பது தெரியும். இந்த 'ஈக்கி' என்பது என்னவெனத் தேடியபோது, இதுவொரு திருநெல்வேலி வட்டார வழக்கு என்று சொன்னார் ஒரு நண்பர். யாழ்ப்பாணத்தில் ஈக்கில்/ ஈக்கில் கட்டு என்று சொல்லுவார்கள்.மேலும் தேடியபோது,  ‘ விளக்குமாத்தைத் தின்ன கழுதை ஈக்கி ஈக்கியா வெளிக்கிருக்கும்’ என்று  ஒரு சொலவடை(கிராமிய வாய்மொழி இலக்கியங்கள்) கிடைத்தது.

கி.ரா அவர்கள் தனது நாவலில் கிராமிய வட்டார வழக்கை ஒரு வர்ணனையில் கையாண்டிருப்பார். ஒரு காளையை வர்ணிக்கும் போது, ' ஈக்கி நுழையுமா பாரு குளம்புக நடுவில! ' என்று எழுதியிருப்பார். அந்தளவுக்கு நெருக்கமான குளம்புகள்.

ஈக்கி போல் நிலவடிக்க என்றால், மெல்லிய/ நேரான என்று சொல்லலாம். ' ஈக்கி மின்னல் அடிக்குதடி' என்று 'காட்டுச் சிறுக்கி ' பாடலிலும் எழுதியிருப்பார்.

Thursday, November 21, 2013

விரிச்சி கேட்டல் : 'வாய்க்குச் சக்கரை போடணும்'

'அமுதம் உண்க நம் அயலிலாட்டி' என்றொரு நற்றிணைப் பாடல்(கபிலர்) உண்டு.அதாவது பக்கத்து வீட்டுப் பெண்(அயல் + இல் + ஆட்டி) அமுதம் உண்ணட்டும் என்கிறாள் தலைவி.

யாராவது நல்ல விஷயம் சொன்னால், 'வாய்க்குச் சக்கரை போடணும்' என்று இப்போது சொல்ற மாதிரி. தலைவி இவ்வளவு சந்தோஷப்படுகிற அளவுக்கு அப்பிடி என்னத்தைச் சொல்லிப்புட்டா பக்கத்து வீட்டுப் பெண்?



தலைவன் வருவானா என்று காத்திருக்கிறாள் தலைவி. தலைவன் வந்திடுவான் கவலைப்படாதே என்று தோழி தேற்றுகிறாள். உடனே தலைவியை மேலும் தேற்ற ஒரு செய்தியையும் சொல்கிறாள்.

"பக்கத்து வீட்டுப் பெண் வேறோருத்தியோடு ஏதோ பேசிக்கொண்டிருக்கும் போது, ஏதோ எழுந்தமானமாக, 'அவன் இப்போதே வந்துவிடுவான்'  என்று கூறினாள். எனக்கென்னவோ அது நல்ல சகுனமாக/செய்தியாகப்படுகிறது" என்றாள்.

ஒரு நல்ல சொல்லைக் கேட்டல், நல்ல சகுனம் என நினைத்தார்கள் பண்டைத் தமிழர்கள்.அதுதான் 'விரிச்சி கேட்டல்' எனப்படுகிறது. ஏதாவது நல்ல வேலையா போகும்போது எங்கிருந்தோ வரும் நல்ல சொல் கேட்டல். உதாரணமாக, மணி அடித்தால் நல்ல சகுனம் என்பது மாதிரி.

தலைவனுக்காக காத்துக்கொண்டிருக்கும் தலைவியிடம் வந்து தோழி இதைச் சொன்னவுடன், தலைவிக்கு மகிழ்ச்சி. அதனால் அந்த வாரத்தையைச் சொன்ன அந்தப் பெண் அமுதம் உண்ணட்டும் என்கிறாள். 

சங்க காலத்தில் திருக்கார்த்திகை விளக்கீடு!

பண்டைய தமிழர் மரபில், கார்த்திகைத் திருநாளன்று தீபங்களை வரிசையாக அடுக்கி விழாக் கொண்டாடும் வழக்கம் இருந்துள்ளது. வட இந்திய மக்களுக்கு தீப + ஆவளி  போல, நம் தமிழர் மரபில் திருக்கார்த்திகை விளக்கீடு கொண்டாடப்பட்டது. ஆனால் அப்போது சமயம் கலக்காத ஒரு கார்காலப் பண்டிகையாக கொண்டாடப்பட்டுள்ளது.


கார் நாற்பது எனும் நூல்,  தன்னைப் பிரிந்து வெளியூருக்குச் சென்றிருக்கும் தலைவனின் வருகையை எதிர்பார்த்துக் காத்திருக்கும் தலைவியின் ஏக்கத்தைக் கார்காலப் பின்னணியில் எடுத்துக்கூறுகிறது. இவை கார்காலத்தில் நிகழும் பண்பாட்டு நிகழ்வுகளையும் எடுத்துக் கூறுகின்றன.

நலமிகு கார்த்திகை நாட்டவ ரிட்ட 
தலைநாள் விளக்கிற் றகையுடைய வாகிப் 
புலமெலாம் பூத்தன தோன்றி சிலமொழி
தூதொடு வந்த மழை  

நன்மை மிகுந்த கார்த்திகைத் திருவிழா நாளில், நாட்டில் உள்ளவர்கள் கொளுத்தி வைத்துள்ள முதல்நாள் விளக்கைப் போல அழகுடையனவாகிப் பூத்திருக்கின்றன தோன்றிப்பூக்கள்(தோன்றி என்பது காந்தல் மலரின் வகை எனப்படுகிறது)'  என்கிற பொருளில் இந்தப் பாடல் அமைகிறது.  

அகநானூறிலும்(நக்கீரர்) ஒரு பாடல் கார்த்திகை விளக்கீட்டைப் பற்றிக் கூறுகிறது.

மழை கால் நீங்கிய மாக விசும்பில்
குறு முயல் மறு நிறம் கிளர, மதி நிறைந்து,

அறுமீன் சேறும் அகல் இருள் நடுநாள்:
மறுகு விளக் குறுத்து, மாலை தூக்கிப்,

பழ விறல் மூதூர்ப் பலருடன் துவன்றிய

விழவு உடன் அயர, வருகதில் அம்ம!


'கார்த்திகையைச் (Pleiades) சேரும் இருள் அகன்ற நடு இரவில் , தெருக்களில் விளக்குகளை வரிசையாக ஏற்றி விழாக் கொண்டாடா வருவாரோ!' என்கிற பொருளில் அமையும் பாடல்.

Monday, October 28, 2013

மூடர் கூடம்


அண்மையில் வெளியான திரைப்படங்களில் இயக்குனர்  நவீன் அவர்கள் இயக்கிய 'மூடர் கூடம் '  மிகவும் பிடித்திருக்கிறது. தமிழ் சினிமாவில் ஒவ்வொரு முயற்சியையும் புதிது என அறிமுகப்படுத்துவது கொஞ்சம் பழசாகப்படுகிறது. Quentin Tarantino வினுடைய படங்கள் போல என்கிற அறிமுகத்துக்கு  எல்லாம் அவசியமில்லை.

இந்த அறிமுகங்கள்,விளக்கங்கள் எதுவுமில்லாமல் படத்தை ஒரு முறை பார்த்துவிடுங்கள். தமிழில் ஒரு புதுமையான திரைப்படம் பார்த்த அனுபவம் கிட்டும்.



படத்தில் அப்படி என்ன இருக்கு ? . ஒரு ஆர்வத்தில், 'படத்தின் கதை என்ன ?' எனக் கேட்பவர்களுக்காக கதையைச் சொல்லிடலாம். சந்தர்ப்ப சூழ்நிலைகளால் நாலு பேரும்  சேர்ந்து திருடப்போறாங்க.படத்தின் கதையே அவ்வளவுதான்.ஆனால் கதை சொல்லும் விதத்தில் புதுமை செய்திருக்கிறார் நவீன்.

அந்த நான்கு பேரில் இயக்குனர் நவீனும் ஒரு பாத்திரமேற்று நடித்திருக்கிறார்.படத்தில் வருகிற அத்தனை பேரின் நடிப்பும்,Deadpan expressions உம் பிரமாதம்.ஒவ்வொரு சிறிய கதாப்பத்திரத்துக்கும் படத்தில் முக்கியத்துவம் உண்டு. நாய்க்கு ஒரு பாடல் கூட உண்டு. Flashback எல்லாம் உண்டு. விலங்குகளை வைச்சும் இந்தச் சமூகத்தோடை கதையை சொல்லிடலாமா!. சில காட்சிகளை நகைச்சுவை என நினைச்சு கடந்தும் போய்விடலாம்.படம் முழுதும் அபப்டித்தான். நகைச்சுவையாகப்  பார்க்கிறவர்கள் அப்படியே கடக்கலாம். அவரவர் பார்வைக்கு,சிந்தனைக்கு என்று இயக்குனர் விட்டுவிட்டாரோ என்னவோ!

இந்தப் படம் பார்த்துவிட்டு நகைச்சுவையே இல்லையே,சிரிப்பே வரல என்று கேட்டால் ஒன்றும் செய்யமுடியாது. கம்யூனிசம் , மார்க்ஸிசம் பேசுகிறார்கள் என்றெல்லாம் அலுத்துக்கொள்ள முடியாத அளவுக்கு அவ்வப்போது சில காட்சிகள்.இந்தப் படத்தில் எல்லோரும் இயல்பாகவே இருப்பார்கள். பார்க்கும் எமக்கு சிரிப்பைத் தூண்டும். உண்மையிலேயே ஒருவரை ஒருவர் ஏமாற்றிக்கொண்டு வாழும் நகைச்சுவையான வாழ்க்கை தானே இது. வெளியிலிருந்து திரையில் பார்க்கும் போது சிரிக்கிறோம். உள்ளிருக்கும் போது தோன்றுவதில்லை.


இறுதியில் பொம்மைக்கும் ஒரு கதை உண்டு. 'நீயும் பொம்மை நானும் பொம்மை' என்கிற பாடல் இயக்குனர் என்ன சொல்ல வருகிறார் என்பதை தெளிவாக்கிவிடும்.இது 'பொம்மை' என்கிற படத்தில் ஜேசுதாஸ் பாடிய பாடல். தமிழில் அவர் பாடிய முதல் பாடல் இது.அதைப் பயன்படுத்தியிருக்கிறார்கள்.


இந்தப் படத்தில் இசையை மிகவும் சிறப்பாகக் கொடுத்திருக்கிறார் சங்கர நாராயணன்.பின்னணியில் 'நந்தவனத்தில் ஓர் ஆண்டி' ஒலிப்பதெல்லாம் சிறப்பு.

தமிழுக்கு ஒரு நல்ல புதிய இயக்குனர் கிடைத்திருக்கிறார்.இந்தப் படம் உருவாக எடுத்த முயற்சிகளை பற்றி ஒரு கட்டுரை தி இந்துவில் (இயக்குனரின் பேட்டி)கூட வந்திருந்தது.  

கம்பன் கவிச்சுவை

சுவாரசியமான கம்பராமாயண பாடலொன்று. மேற்குல சூரியன் உதிக்குமா?. அதான் கம்பன். கம்பனின் கவிச்சுவையை கொஞ்சம் இரசிப்போம் என்று யூடியூபில் தேடியபோது ராகவன்(  ) அவர்கள் தொகுத்த ஒரு காணொளி கிடைத்தது. 



வேறு வேறு time zone பற்றி கம்பன் சொல்லுகிறார்.வடக்கே செல்லச் செல்ல காற்றின் அழுத்தம் குறையும், உலகம் உருண்டைன்னு எப்படி அந்தக் காலத்தில் தெரிஞ்சிருக்கும்! வால்மீகி ராமாயணத்தில் இல்லாமல் கம்பராமாயணத்தில் மட்டுமே உள்ள காட்சி.


எத்தனையோ யோசனைகளைக் கடந்து இலங்கையில் இருந்து வடக்கு நோக்கி செல்லும் அனுமனுக்கு வடதுருவத்தை அடைந்ததும் திசை மாறுகிறது.

கீழுள்ள பாடலும் பொருளும் இன்னொரு இணையப்பக்கத்தில்(https://groups.google.com/forum/#!msg/mintamil/-MA8upTnKKA/vrLUjNRhyaEJ) இருந்து எடுக்கப்பட்டது. 




அத்தடங் கிரியை நீங்கி, அத்தலை அடைந்த வள்ளல்,
உத்தரகுருவை உற்றான். ஒளியவன் கதிர்கள் ஊன்றி,
செத்திய இருள் இன்றாக விளங்கிய செயலை நோக்கி,
வித்தகன், 'விடிந்தது!' என்னா, 'முடிந்தது, என் வேகம்!' என்றான்.

மேருமலையை நீங்கி அப்பால் சென்று உத்தரகுருவை அடைந்தான். அங்கே அடர்ந்த இருளை நீக்கியவாறு சூரியன் பிரகாசித்துக் கொண்டிருந்தது. 'அடடா! அதற்குள் விடிந்துவிட்டதா! என்ன வேகமாய் நான் வந்து என்ன பயன்! விடிவதற்கு முன்னால் அங்கே போய்ச் சேர வேண்டும் என்று நினைத்தேனே! இங்கேயே விடிவாகிவிட்டதே!' என்று மயங்கினான் அனுமன். மனக்கலக்கம் அடைந்தான்.

அடுத்த கணம், சூரியன் இருக்கும் திசையைக் கவனித்தான்.

கால் திசை சுருங்கச் செல்லும் கடுமையான், - 'கதிரின் செல்வன்
மேல் திசை எழுவான் அல்லன்; விடிந்ததும் அன்று; மேரு
மாற்றினான், வடபால் தோன்றும் என்பது மறைகள் வல்லோர்
சாற்றினார்' என்ன, துன்பம் தவிர்ந்தனன் - தவத்து மிக்கான்.

காற்றும் வேகம் குறையும்படியான விரைவில் செல்லும் தவத்தில் மிக்கவனான அனுமன், சூரியன் மேற்கு திசையில் இருப்பதை நோக்கினான். 'என்ன மடையன் நான்! சூரியன் மேற்கிலா உதிக்கும்! இது விடியல் இல்லை. அஸ்தமனம். சூரியன் மேரு மலையின் வலதுபக்கத்தில் உள்ளவர்களுக்கு (மற்ற பகுதியில் இருட்டான பிறகு) மேற்கில் தோன்றும் என்று வேதங்களைக் கற்று உணர்ந்தவர்கள் சொல்வார்களே,' என்று துன்பம் தீர்ந்தான்.

Wednesday, September 18, 2013

கொழும்பு : பன்னாட்டுப் புத்தகக் கண்காட்சி

கடந்த 14 ஆம் திகதி ஆரம்பமாகிய 'கொழும்பு சர்வதேசப் புத்தகக் கண்காட்சி'யில் இந்தத் தடவையும் கிட்டத்தட்ட நானூறுக்கும் மேற்ப்பட்ட  புத்தக நிலையங்கள். 15 ஆவது தடவையாக இந்த பன்னாட்டுப் புத்தகக் கண்காட்சி BMICH இல் நடைபெறுகிறது.இந்தக் கண்காட்சி ஒரு வாரத்துக்கு நடைபெறும்.



முதல் நாளிலேயே ஒரு இலட்சம் பார்வையாளர்கள் வந்து போனார்கள் என ஊடகங்கள் சில செய்தி வெளியிட்டிருந்தன.இரண்டாவது நாள் ஞாயிறு ஆகையால் அதிக கூட்டம்.நீங்கள் செல்லும் போது முதலிலேயே Hall A க்குச் சென்று புத்தக நிலையங்கள் தொடர்பான விபரம் அடங்கிய துண்டை பெற்றுக்கொண்டால் இலகு.அல்லது முன்னாலேயே பெற்றுக்கொள்ளலாம்.

இந்த முறை சரியாகத் தமிழ்ப் புத்தக நிலையங்களை இனங்காண முடிந்தது. தமிழ்ப் புத்தக விரும்பிகளுக்கு ஏற்ற நிறைய புத்தகங்கள் ஜெயா புக் சென்டரிலும்(Hall -A : A-47, 51- 58),பூபாலசிங்கம் புத்தகசாலையிலும்(A - 25,27) மற்றும் புக்வின்னிலும்( Hall J - 400) கிடைக்கிறது. ஜெயாவில் அதிகமாக ரமணிச்சந்திரன்,பாலகுமாரன்,இந்திரா பார்த்தசாரதி,சுஜாதா புத்தகங்களை காணக்கிடைத்தது. 

பூபாலசிங்கத்தில் எஸ் ராமகிருஷ்ணன் புத்தகங்கள் கிடைத்தது.ரமணிச்சந்திரன்,பாலகுமாரன் ,இலக்கியப் புத்தகங்கள் அதிகம்.நடுத்தர வயதானவர்கள் அதிகமாக ரமணிச்சந்திரன் கதைகளை புரட்டிக்கொண்டிருந்ததால் அந்தப் பகுதி கொஞ்சம் சிரமம்.பத்து நாட்களில் ஜாவா' புத்தகத்தை பத்து நிமிடமாக ஒருவர் படித்துக்கொண்டு வழிவிடவில்லை. பிற மொழிப் புத்தக நிலையங்கள் அளவுக்கு தமிழில் கூட்டம் இல்லை.கூட்டம் இல்லாதது நமக்குச் சாதகம்.பொறுமையாகத் தேர்ந்தெடுக்கலாம். எக்சைலையும், கோணல்களையும் கொஞ்சம் படிக்கலாமா என்று யோசித்துவிட்டு வைத்துவிட்டேன்.படித்துப் பார்க்க வேண்டும்.இரண்டு மூன்று புத்தக நிலையங்களில் உள்ள புத்தகங்களை புரட்டவே நேரம் சரியாக இருந்தது.



எஸ் ராமகிரிஷ்ணன் அவர்களின் 'காண் என்றது இயற்கை' ,ஜெயமோகனின்  'ஏழாம் உலகம்', சுஜாதாவின் 'தோரணத்து மாவிலைகள்',மதனின் 'கிமு கிபி' யோடு வீடு திரும்பவேண்டியதாகிவிட்டது.திரும்பப் போவதாக உத்தேசம்.

பாடசாலை மாணவர்களுக்கு ஏற்ற பயிற்சிப் புத்தகங்கள், பாடப்புத்தகங்கள் அதிகம்.பலர் குடும்பமாக கண்காட்சிக்கு  வந்திருந்தது மகிழ்ச்சியாக இருந்தது. கண்காட்சி 22 ஆம் திகதி வரை நடைபெறும்.மறக்காமல் குழந்தைகளையும் புத்தகக் கண்காட்சிக்கு அழைத்துச் செல்லுங்கள்.

Sunday, September 15, 2013

சில கணங்கள் : அகம்புறம்

ஒரு சில புத்தகங்களை, சுவாரசியமான துப்பறியும் கதையைப் படிப்பது போல  எடுத்த எடுப்பிலேயே படிச்சு மூடி வைச்சிட முடியாது. வாழ்க்கைல எல்லாத்தையுமா ரசிச்சுடுறோம்.நம்முடைய வேகம் அப்படி. அதே வேகத்தை இரசனையான பகிர்வுகளைக் கொண்ட புத்தகங்களின் பக்கங்கள் மேல் காட்ட முடியுறதில்லை. எதை எப்படி வாசிக்கவேண்டுமென ஒரு சில பக்கங்களை தாண்டிய பின் புத்தகங்களே நமக்குச் சொல்லிக்கொடுக்கும்.ஒரு சில புத்தகங்களை  ஒரு நாளைக்கு ஒரு சில பக்கங்கள் எனப் படிப்பது இன்பம். அப்படி ஒரு புத்தகம் தான் வண்ணதாசன் அவர்கள் எழுதிய அகம்புறம்.கடற்கரையோரமாக நடந்து போவதற்கும்,கடலை சலிக்காமல் நின்று பார்த்துக்கொண்டிருப்பதற்கும் நிறையவே வித்தியாசம் இருக்கிறது.சில கணங்கள் மெதுவாகவே நகர வேண்டும்.பக்கங்களும் அப்படித்தான்.இந்த 'மெதுவாக' என்பது போகப் போக இயல்பாகிவிடும்.வாழ்க்கையின் சில கணங்களை மெதுவாக்கிவிடும் இயல்பு இரசனைகளுக்கு உண்டு.குழந்தையைப் பார்க்கும் போது சட்டென்று விரிகிற புன்னகை மாதிரி.

புத்தகத்தை இன்னும் படித்துமுடிக்கவில்லை.இப்போதைக்கு முடிப்பதாகவும் உத்தேசம் இல்லை. அந்தப் புத்தகத்திலிருந்து இதுவரை பகிர்ந்துகொண்ட ஒரு சில பகுதிகளை கீழே தந்திருக்கிறேன்.

'வாழ்க்கை தொடர்ந்து விதிகளைப் பொய்யாக்கிக்கொண்டேதான் இருக்கிறது.இது இப்படித்தான் என்று முடிவுகட்ட முடியாதபடி,தன் காலடிச் சுவடுகளைத் தானே அழித்துக்கொண்டு அது நகர்கிற விதம்,யூகங்களுக்கு அப்பாற்பட்டது. அச்சடித்த புத்தக வரிகளின் மேல் சின்னஞ்சிறு பிள்ளையார் எறும்பு ஊர்வது போல எந்தத் தடங்கலும் இன்றி அது ஊர்ந்துகொண்டு இருக்கிறது.அடுத்த பக்கங்களின் வாசிப்பு அல்ல,ஊர்ந்துகொண்டே இருக்கும் அந்த உயிரின் அழகு முக்கியம் என்று நமக்குப் பிடிபட்டால் போதும்.' - வண்ணதாசன்


சினிமாக் கொட்டகைக்குள் இருக்கும்போது பெய்கிற மழை , ஒரு சாதாரண சினிமாவைக்கூட நல்ல சினிமாவா ஆக்கிவிடும் -#வண்ணதாசன்

நீர்த்தாரையை உள்ளங்கையில் ஏந்துவதற்கும் மழை தான் சொல்லிக்கொடுத்திருக்கும் - வண்ணதாசன் 

Saturday, August 24, 2013

கவிப்பேரரசு வைரமுத்து: இலக்கியப்பாடல்கள்

வைரமுத்து அவர்களின் பிறந்தநாளில் இருந்து அவரைப்பற்றிய பதிவுகளையே தொடர்ந்து எழுதுகிறேன்.வெறும் பாட்டு வரியில் என்ன இருந்துவிடப் போகிறது என கடந்துபோக  முடியாதபடி, அவற்றுள் ஒருவித  இலக்கியச் சுவையை,விஞ்ஞானத்தை,தகவல்களைக் கொண்டு வந்தவர் அல்லவா!.கொண்டுவந்து சேர்த்தார்  என்பதை விட ,நமக்கு அதை அறிமுகப்படுத்த முயன்றுகொண்டிருப்பவர் என்று சொன்னால் பொருத்தமாக இருக்கும்.அவரது முயற்சியை தொடர்ந்து கவனித்து வருபவர்கள் அறிந்திருப்பார்கள். சாதரணமாக அனுகிவிட்டுப் போகாதபடி புதுமையால் கட்டிவைக்கும் பாடலாசிரியர். 

வைரமுத்து அவர்கள் ,'இரண்டாம் உலகம் ' திரைப்படப் பாடல்களை வெளியிட்டு வைக்கும்போது, "இலக்கியத்தின் சாரங்களைப் பாட்டுக்குள் கொண்டுவருவதற்குத்தான் முப்பது ஆண்டுகளுக்கும் மேலாய் முயற்சிசெய்து வருகிறேன்" என்று கூறியிருந்தார்.

அவர் இலக்கியத்தின் பால் ஈர்க்கப்பட்டு, அவற்றை  மாற்றி எளிமையான வரிகளாகக் கொடுத்தார்.ஆனால்  இலக்கியப் பாடல்களை கொஞ்சம் கூட மாற்றாமல் நேரடியாகப் பயன்படுத்தியிருக்கிறார். கூடுதலாக ரஹ்மானுக்கு எழுதிய பாடல்களில் நேரடியான வரிகள் இடம்பெற்றிருக்கும். ஒரு சில உதாரணங்கள் மிகவும் பிரபலம்.பலருக்கும் தெரிந்திருக்கும். கவனித்த இன்னும் சில பாடல்களையும் தொகுத்திருக்கிறேன். வள்ளுவன் கூற்றுக்கிணங்க,அவர் அப்படி நேரடியாகத் தந்த ஒரு சில பாடல்களே தெரியும்.அடியேனுக்குத் தெரியாதது ஏதும் உங்களுக்குத் தெரிந்திருந்தால்/கவனித்திருந்தால்  பகிருங்கள்.

ஒரு சில பாடல்களில் காட்சியமைப்பும் அப்படியே அமைந்துவிடும். அது இயக்குனர்களின் திறமை.'திருட்டுப்பயல் படத்தில் இடம்பெற்ற 'தையத்தா தையத்தா' பாடலில்,ஆண்டாள் அருளிய நாச்சியார் திருமொழியை அப்படியே பயன்படுத்தியிருப்பார்.பரத்வாஜ் இசையில் அமைந்த இந்தப் பாடலில் இரண்டாவது Interlude இல் இந்த வரிகள் இடம்பெறும். 

குங்குமம் அப்பி குளிச்சந்தம் மட்டித்து மங்கள
வீதி வலம் செய்தி மணநீர் அங்கவனோடும்
உடன்சென்ற ரங்கனை மேல் மஞ்சமாட்ட
கனாக் கண்டேன் தோழி நான்

இன்னொரு பிரபலமான பாடலும் இதே காட்சியமைப்பில் நினைவில் வருமே! 'மார்கழித் திங்கள் அல்லவா' பாடலில் ஆரம்பத்தில் திருப்பாவை அப்படியே பயன்படுத்தப்பட்டிருக்கும்.  

சென்னியது உன்பொன் திருவடித் தாமரை, சிந்தையுள்ளே
மன்னியது உன் திருமந்திரம், சிந்தூர வண்ணப் பெண்ணே
முன்னிய நின்னடியாருடன் கூடி முறை முறையே
பன்னியது என்றும் உந்தன் பரமாகம பத்ததியே.

'கண்ணெதிரே தோன்றினாள்' எனும் பெயரை படத்திற்கு இட்டது குருஜி சுஜாதா என்று எங்கோ படித்ததாக நினைவு. அந்தப் படத்திற்கு வசனங்கள் அவர் தான்.அந்தப் படத்தில்  தேவா இசையில் அமைந்த 'சின்ன சின்னக் கிளியே'   பாடலில்,அதே போல இடையிசையில்,அபிராமிப்பட்டார் எழுதிய  'அபிராமி அந்தாதி' பாடல் ஒன்று இடம்பெறும்.

சென்னி -தலை , சிந்தூர வண்ணப் பெண்ணே -  சிவந்த வண்ணப் பெண்ணே. என்னவொரு ஓசை நயம் .இதெல்லாம் தமிழுக்கே உரிய சிறப்பு .ஆர்வமிருந்தால் பொருள் எல்லாம் தேடிப் படித்துக்கொள்ளுங்கள். 

ஏனைய இசையமைப்பாளர்கள் எல்லோரும் இடையிசையில் போட்டுக்கொள்கிறார்கள்.ரஹ்மான் மட்டும் ஆரம்பத்திலேயே பயன்படுத்திக்கொள்வார். 'மார்கழித் திங்கள் அல்லவா', தீண்டாய் மெய் தீண்டாய்' பாடலின் ஆரம்பத்தில் வருகிற வெள்ளிவீதியார் எழுதிய கன்றும் உண்ணாது கலத்தினும் படாது' என்கிற குறுந்தொகைப் பாடல் போன்றவற்றை உதாரணமாக சொல்லலாம். 


முழுமையாக ஒரு பாடல் அபப்டியே ஒரு பாடலாக பயன்படுத்தப்படட் இடம் என்றால் ,காதலன் படத்தில் ,  இடம்பெற்ற   'இந்திரையோ இவள் சுந்தரியோ'(திருக்குற்றாலக் குறவஞ்சி) பாடலைச் சொல்லலாம்.


இலக்கியப் பாடல்கள்ல அழகான ஓசை நயம் உண்டு. தமிழ் இனிமையான மொழினு சொல்லுகிறோம் .சாதாரண மக்களும் அதைக் கொஞ்சம் அனுபவிக்க, இது போல வரிகள் இடம்பெற  அனுமதிக்கும் இயக்குனர்களுக்கும், இசையமைப்பாளர்களுக்கும் நன்றி சொல்லியே ஆக வேண்டும்.இலக்கிய வரிகளில் சிறுதும் மாற்றமில்லாமல் அப்படியே பயன்படுத்தப்பட்ட வரிகள் தான் இவை. மாற்றிப் பயன்படுத்தப்பட்ட வரிகள் என்றால் ஏராளமான உதாரணங்கள்  உண்டு.

Saturday, August 3, 2013

வைரமுத்து : திருக்குறள்


'அவள் வருவாளா' என்கிற பாடல் 98 களில் மிகவும் பிரபலம். அந்தப் பாடலை இப்போதுகூட சத்தம் எழுப்பாமல் மனதுக்குள் பாடிப் பார்க்காதவர்கள் கிடையாது.  தேவா இசையமைப்பில் ஷாகுல் ஹமீதும் ஹரிகரனும் பாடிய பாடல்.

அதில் ' ஏய் கண்டுகேட்டு உண்டுயிர்த்து உற்றறியும் ஐம்புலனும் பெண்ணிலிருக்கு, அந்தப் பெண்ணிலிருக்கு' ங்கிற வரியை மட்டும் ஷாகுல் ஹமீது பாடுவார். ஹரிகரன் குரல் இருக்கும் போதே அந்தக் குரல் தனித்துத்தெரியும். "வீ மிஸ் யூ ஷாகுல் ஹமீத்" என்று சொல்லத் தோன்றுகிறது. 


புணர்ச்சிமகிழ்தல் அதிகாரத்தில இருக்கிற குறளை பயன்படுத்தியிருக்கார் வைரமுத்து. அந்தக் குறளை வேகமாகப் பாடுமளவு, துல்லியமான குரல் வளம் உடையவர் ஷாகுல் ஹமீத்.

சரி காமத்துப்பாலில் வருகிற அந்த வரியில் அப்படி என்ன சிறப்பு. 

கண்டுகேட்டு உண்டுயிர்த்து உற்றறியும் ஐம்புலனும் 
ஒண்தொடி கண்ணே உள.


எனும் குறள் தான் அது.



கண்களால்  பார்த்து, செவியால் கேட்டு, நாவால் உண்டு, மூக்கால் மோந்து, உடம்பால் தீண்டி என் ஐம்பொறிகளாலும் அனுபவிக்கும்படும் இன்பம், ஒளிமிக்க வளையல்களை அணிந்த மனைவியிடம் மட்டுமே உண்டு. (நன்றி : பேராசிரியர் சாலமன் பாப்பையா உரை )

இனிமையான மொழி அல்லவா வள்ளுவன் மொழி :) அதுவும் காதல் மொழியில் சுவை அதிகம்.



கவிஞ்ஞர் வாலியும் ஒரு குறளை  பயன்படுத்தி இருக்கிறார் என ஒரு வலைப்பதிவில் படித்தேன். 

நெஞ்சத்தார் காத லவராக வெய்துண்டல் 

அஞ்சுதும் வேபாக் கறிந்து.


என்னவர் என் நெஞ்சிலேயே வாழ்வதால் சூடாக உண்டால் அது அவரைச் சுட்டுவிடும் என்று எண்ணி உண்ணப் பயப்படுகிறேன். (சாலமன் பாப்பையா உரை)

தீன படத்தில் இடம்பெற்ற 'காதல் வெப்சைட் ஒன்றில்' பாடலில் 

"Hot box-ல் வைத்த food உண்பதில்லை இனி வாழ்வில் எந்த நாளும்.
என் உள்ளமெங்கும் நீ நின்றிருக்க உன்னை உஷ்ணம் தாக்கக்கூடும்."

என்று எழுதியிருப்பார் கவிஞர் வாலி. :)

Saturday, July 27, 2013

'நெஞ்சுக்குள்ள' - வைரமுத்துவும் குறுந்தொகையும்

'நெஞ்சுக்குள்ள உம்ம முடிஞ்சிருக்கேன் ' பாடலில் 'பட்சி ஒறங்கிருச்சு பால் தயிரா தூங்கிருச்சு,
நொச்சி மரத்து இலைகூட தூங்கிருச்சு' என்றொரு வரி. அதென்ன 'நொச்சி மரத்து இலை கூட தூங்கிரிச்சு'?

குறுந்தொகையில்(138) வருகிறது : 

கொன்னூர் துஞ்சினும் யாந் துஞ்சலமே
எம் இல் அயலது ஏழில் உம்பர்
மயிலடி இலைய மா குரல் நொச்சி
அணி மிகு மென் கொம்பு ஊழ்த்த
மணி மருள் பூவின் பாடு நனி கேட்டே.

'ஊரே தூங்கிடிச்சு,நான் மட்டும் தூங்கல்ல. என் வீட்டுக்கு பக்கத்துல உள்ள ஏழில் மலைல , மயிலோடை கால்களை மாதிரி இலைகளைக் கொண்ட நொச்சி மரத்தோட பூக்கள் உதிர்கிற சத்தத்தை இரவெல்லாம் கேட்டுக்கொண்டிருந்தேன்' என தலைவனுக்காக காத்துக்கொண்டிருக்கும் தலைவி சொல்கிறாள்.

ஆனால் வைரமுத்து அந்த நொச்சியும் தூங்கிடிச்சு என்கிறார். இலக்கியத்தை எவ்வளவு அழகா தொடர்புபடுத்துகிறார்.

Saturday, July 13, 2013

வைரமுத்து : தேடல் உதிர்த்த வரிகள்

கவிப்பேரரசு வைரமுத்து அவர்களின் பிறந்தநாள் இன்று. கவிஞனுக்குக் கவிதை எழுதி வாழ்த்துவதா !  நினைச்சுப் பார்க்க  முடியவில்லை .அதனால் இந்தப் பதிவு.  வரிகளை / இசையோடு சேர்ந்துகொள்ளும் தமிழ்ச் சொற்களின்  அழகை   இரசிக்கும்  பெரும்பாலானோர்களிடம் போய் எந்த வரிகள் அதிகம் பிடிக்கும் எனக் கேட்டால், உடனே ' நறுமுகையே நறுமுகையே' என்று பதில் வரும். விதிவிலக்காக யாராவது இருந்தால் மன்னிக்க :) . அந்தளவுக்கு இலக்கியப் பாடல் வரிகளையும் சினிமாப் பாடல்களில் தைரியமாகப் புகுத்தி இரசிக்க  வைத்தவர். 

'தீண்டாய் மெய் தீண்டாய்' பாடல் தொடங்கி  'நறும்பூக்கள் தேடும் திருத் தும்பியே' வரை சில பாடல்களை சங்கத் தமிழ் கலந்து எழுதினார். காதலன் படத்தில் சில நிமிடங்கள் வரும் பாடலில் குற்றாலக் குறவஞ்சியையும், தீண்டாய் மெய் தீண்டாய் பாடலின் ஆரம்பத்தில்  குறுந்தொகையையும் அப்படியே பயன்படுத்தியிருப்பார்.வரவிருக்கும்  கோச்சடையானில் கூட  இலக்கியத் தமிழில்  பாடல் எழுதுவதாகப் பகிர்ந்திருந்தார்.

இலக்கியத்தையும் அவர் பயன்படுத்திய உவமைகளையும் விட்டுவிட்டு கொஞ்சம் விஞ்ஞானம் பற்றி பேசுவோம் . விஞ்ஞானம் என்றால் ஒன்றும் சிக்கலான தகவல்களை தந்துவிட்டுப் போகவில்லை . அடிப்படை விஞ்ஞானத்தைக் கொஞ்சம் கற்பனையோடு ,காதலோடு சொல்லியிருப்பார் . கொஞ்சம் சிக்கலான தகவல்களை விளக்கப் போவதில்லை . ஒரு தொகுப்பாக மட்டுமே அமையும்.  சில வரிகள் நேரடியாகவே புரிந்துகொள்ளக் கூடியவை.


தண்ணீரில் மூழ்காது காற்றுள்ள பந்து 
என்னோடு நீ பாடி வா சிந்து  


என்று 'இளமைக் காலங்கள்' படத்திலேயே ஆரம்பித்து விட்டார்.

------------------------------------------------------------------------------------------------------------

'கடல் கொண்ட நதியோ முகம் தனை இழக்கும்
நான் உன்னில் கலந்தால் புது முகம் கிடைக்கும் 


பாடல் : கண்டுகொண்டே கண்டுகொண்டேன் 


------------------------------------------------------------------------------------------------------------
நீலம் மட்டும் இழந்துவிட்டால்
வானில் ஒரு கூரையில்லை 


பாடல் : பூ கொடியின் புன்னகை  


------------------------------------------------------------------------------------------------------------

நீலத்தைப் பிரித்துவிட்டால்
வானத்தில் ஏதும் இல்லை
 

பாடல் : வண்ணம் கொண்ட வெண்ணிலவே 

----------------------------------------------------------------------------------------------------------------------------------

விதையொன்று உயிர் கொள்ள

வெப்பம் காற்று ஈரம் வேண்டும் 

காதல் வந்து உயிர் கொள்ள
காலம் கூட வேண்டும். 


பாடல் : முதன் முறை கிள்ளிப் பார்த்தேன் 


------------------------------------------------------------------------------------------------------------

என் உள்ளம் வெறுங் கோப்பை தான் தடுமாறும் கண்ணே 

உன் காதல் நீர் ஊற்றினால் ஆடாது பெண்ணே 

பாடல் : என் செஞ்சில் தூங்கவா நிலாவே

----------------------------------------------------------------------------------------------------------------------------------

நிலம் கடலாகும்
கடல் நிலமாகும்
நம் பூமி என்றும் அழிவதில்லை 


பாடல் : நாளை உலகம் இல்லையென்றால்

----------------------------------------------------------------------------------------------------------------------------------


கடலை வானம் கொள்ளை அடித்தால்
மேகம் என்று அர்த்தம்
 


பாடல் : கண்ணும் கண்ணும் கொள்ளை அடித்தால்

----------------------------------------------------------------------------------------------------------------------------------


ஓடுகிற தண்ணியில் ஆக்ஸிஜன் மிக அதிகம்
பாடுகிற மனசுக்குள் ஆசைகள் மிக அதிகம். 


பாடல் : காதல் அணுக்கள்

----------------------------------------------------------------------------------------------------------------------------------



வெளிய பூத்து நீ உள்ள காய்க்கிற கடலக்காடு நீ 

பாடல் : அழகான ராட்சசியே

----------------------------------------------------------------------------------------------------------------------------------


தத்தி நடக்குற வாத்துக்கூட்டம் தண்ணிக்குள்ள முட்ட போடுமடி
வாத்து முட்டயப் போல உதட்டில் வந்த சொல்லு நெஞ்சில் முங்குதடி 
பாடல் : தாஜ்மகால் படப் பாடல் 

------------------------------------------------------------------------------------------------------------

பூகம்ப வேளையிலும்
இரு வான்கோழி கலவி கொள்ளும் 
பாடல் : குளிருது குளிருது 

------------------------------------------------------------------------------------------------------------

காட்டு முயலுக்கு பனி பிடிக்கும்
கானக்குயிலுக்கு வெயில் பிடிக்கும் 

பாடல் : குச்சு குச்சு ராக்கம்மா

------------------------------------------------------------------------------------------------------------

இதயம் துடிப்பது நின்றாலும்
இரண்டோர்  நிமிடம் உயிர் இருக்கும்
 

பாடல் : ஜீன்ஸ் படப் பாடல்  


------------------------------------------------------------------------------------------------------------
அழகிய நிலவில் ஆக்ஸிஜன் நிரப்பி
அங்கே உனக்கொரு வீடு செய்வேன்.
 

பாடல் : அன்பே அன்பே

------------------------------------------------------------------------------------------------------------

வேறு வரிகள் ஏதும் நினைவில் இருப்பின் பகிர்ந்துகொள்ளுங்கள்.

Sunday, June 23, 2013

முருகன் : பகிர்வுகள்

ஐந்தாம் நூற்றாண்டு வரை முருகனுக்கு வள்ளி ஒருத்தி தான் மனைவி. வடமொழிப் பண்பாட்டுக் கலப்பில் ஸ்கந்தக் கருத்து நம் முருகக் கருத்துடன் கலந்த பின் தான் தேவசேனை எனும் மற்றொரு மனைவி ஏற்பட்டதாக ஒரு கட்டுரையில் சுஜாதா குறிப்பிட்டிருக்கார். "சேயோன் மேய மைவரை யுலகமும்" என தொல்காப்பியம் கூறும் சேயோன் தான் சுத்தமான தமிழ்க் கடவுள் போல. அதுவும் ஆதிகாலத்தில் சேவல்தான் முருகனின் கொடி. பின்னர் தான் மயில் வாகனமாகியிருக்கிறது.

தெய்வம் பற்றி தேடிக்கொண்டிருந்ததில் 'தெய்வம் ' எனும் சொல் எப்படி உருவானது என சில தகவல்களில் விக்கியில் கிடைத்தது.

'தெய்' என்ற உரையசைக் கிளவியிலிருந்து தான் தெய்வம் எனும் சொல் வந்திருக்கிறது. 'தெய்யனே' எனும் சிங்களச் சொல்லும் அங்கிருந்து வந்திருக்கலாம் . 
அண்டவெளியில் உள்ள அனைத்துப் பொருள்களும் ஒன்றோடொன்று உரசித் தேய்வதில் உயிரோட்ட ஆற்றல் பிறக்கிறது. இந்தத் தேய்தலில் பிறக்கும் ஆற்றலைத் தேய்வு என்றிருக்கின்றனர். பின்னர்  அது தேய்வம், தெய்வம் என்றாகியிருக்கிறது(நன்றி  விக்கிபீடியா).

புறத்தார்க்குச் சேயோன்றன் பூங்கழல்கள் வெல்க" என திருவாசகத்தில் வருகிறது. இதில் தூரமாயிருப்பவன் என்று பொருள். ஐந்தாம் தலைமுறை மூத்த ஆணை சேயோன்(பாட்டனின் பாட்டன் ) என அழைக்கிறோம்.


Sunday, May 19, 2013

கதை நேரம் : பாலுமகேந்திரா

மேசை மீது  ஒரு paperweight , அதன் கீழே பறக்கும் ஒரு சில கடதாசிகள், பேனை,புல்லாங்குழல் இசை என அனைத்தும் இன்னமும் நினைவில் இருந்தால் நீங்களும் பாலுமகேந்திராவின் 'கதை நேரம் ' தொடருக்கு இரசிகர் தான். அந்தளவுக்கு ஒரு மிகப்பெரிய தாக்கத்தை ஏற்படுத்தியிருந்தது அந்தத் தொடர். ஒவ்வொரு கதாப்பத்திரங்களுக்கும் செயற்கைத் தன்மை அற்ற உணர்வை கொடுத்திருப்பார் .

நான் பார்த்த போது என் வயது நுண்ணிய உணர்வுகளை எல்லாம் உற்றுநோக்கும் அளவில் இருக்கவில்லை . இயற்கையாகவே ,கதையின் போக்கிலேயே பாத்திரங்களின் உணர்வுகளை பிரதிபலித்ததால் இன்று வரை அந்தக் கதாப்பாத்திரங்கள் கூட நினைவில் இருந்து அகலவில்லை. எத்தனை தடவைகள் பார்த்தாலும் சலிக்காத திரைக்கதை,இயக்கம். அது பாலுமகேந்திராவுக்கே உரிய  வித்தை. இப்போது அந்தத் தொடர்களை  மீண்டும் பார்க்கும் போது Lighting இல் இருந்து எத்தனை விடயங்களை இந்த மனுஷன் கவனித்திருக்கிறார் என வியப்பாக இருக்கிறது. அவர் ஒரு ஜீனியஸ். அவர் தொடக்கி வைத்த புதிய அத்தியாயத்தை யாரும் பின்பற்றவில்லை என்பது தான் கவலைக்குரியது.  

மனதினில் கொஞ்சம் அமைதி நிலவும் வேளையில் 'கதை நேரம் 'தொடரில் ஒன்றை தேடிப் பார்க்கலாம் எனத் தோன்றுகிறதென்றால்,அது தான் அதன் வெற்றி.




மொத்தமாக 52 சிறுகதைகளை படமாக்கியிருந்தார் இயக்குனர் பாலுமகேந்திரா. அதில் சுஜாதாவினுடைய சிறுகதைகள் 10 . ஜெயந்தன் ,திலகவதி ,மாலன் ,சுந்தர் ராமசாமி,வாஸந்தி போன்றவர்கள் எழுதிய சிறுகதைகளை மிகவும் சிறப்பாக படமாக்கியிருந்தார். ஒவ்வொரு சிறுகதைகளையும் மிகவும் அழகாக திரையில் கொண்டுவந்திருப்பார் . சிறுகதைகள் தரும் அதே உணர்வை திரையில் வடிப்பது என்பது கடினமான காரியம். சிறுகதைகளை எப்படிப் படமாக்குவது என அவரிடம் இருந்து கற்றுக்கொள்ளலாம்.


ஒவ்வொரு கதையையும் தனித் தனியே எடுத்து ஆராயலாம் .அவ்வளவு ஆழமான கருவைக் கொண்ட கதைகள் . இயன்றவரை இரசித்த சிலவற்றை தனித் தனியே எழுதலாம் என்றிருக்கிறேன்.



Friday, May 17, 2013

பாடிண்ட ஈனம் நீயானு...

மலையாளப்  பாடல்கள் மீது கொஞ்சம் ஈடுபாடு உண்டு. அண்மையில் காதுகளுக்கும் கண்ணுக்கும் இனிமை தரும் ஒரு பாடல் கேட்டேன். இந்தப் பாடல் வந்தது 2012 ல். என் கண்ணில் இப்போது தான் பட்டது.  'Yuvvh" எனும் பாடல் தொகுப்பிலிருந்து   "நெஞ்சோடு சேர்த்து பாட்டொன்னு பாடாம்" என்றொரு பாடல் .

மீண்டும் மீண்டும் பல தடவைகள் கேட்டுவிட்டேன்."பாடிண்ட ஈனம்(tune) நீயானு", "நீ வரு ஈ  பாட்டின் ராகமாய்", "விரியுன்ன சித்ரம் நீயானு " என்று அழகான வரிகள் கொண்டு கட்டப்பட்ட பாடல்.   


பாடலின் காட்சியமைப்பின் அழகுக்கு ஒரு காரணம் Nazriya Nazim .ஒவ்வொரு அசைவுகளையும் அழகாக படம்பிடித்திருக்கிறார்கள். 'நேரம்' என்றொரு தமிழ் திரைப்படத்தில் கூட நடித்திருக்கிறார். மம்முட்டி நடித்த 'Palunku' எனும் படத்தில் குழந்தை நட்சத்திரமாக அறிமுகமானவர். தமிழில் இனி பல படங்களில் நடிப்பார் என எதிர்பார்க்கலாம்.

பாடலுக்கு இசையமைத்தது ஸ்ரீஜித்,சச்சின். பாடலைப் பாடியது ஆலப் ராஜு. 

Monday, April 22, 2013

'நெஞ்சினிலே' - மூர்சிங்

உயிரே படத்தில் நெஞ்சினிலே பாடலில்  மலையாளம் கலந்து வருவது இனிமை தருவது போல, ஆரம்பத்தில் இருந்து தனித்து,பின் பிற வாத்தியங்களோடு இணைந்து  ஒலிக்கும் மோர்சிங் இசை இனிமை.

இந்த மூர்சிங்(ஆபிரிக்க வாத்தியம்) இசை பற்றி சுஜாதா பகிர்ந்திருக்கிறார் . இதை ரஹ்மான் அவ்வப்போது திறமையாகப் பயன்படுத்துவார் என்கிறார். கேட்பதற்கு 'டொன்ட்டி டொன்ட்டி' என்று சுவர்ப்பூச்சி போலத்தான் ஒலிக்கும். இந்த மூர்சிங் இசையை உற்றுக் கவனித்தால் தான் லய வின்னியாசங்கள் புரியுமாம். இதனை வாசிப்பது கடினமாம். உள்ளுக்குள்ளே கொன்னக்கோல் போல அந்தத் தாளத்தை சொல்லிக்கொண்டு வரவேண்டுமாம்.

வாசித்த பின் கேட்டுப்பார்த்தேன். இயற்கை ஒலிகளோடு ஆரம்பமாகும் மூர்சிங் ஏதோ புரிகிறது.

Tuesday, April 16, 2013

தேநீர் வாசம் - மதன் கார்க்கி


வாழ்வில் ஒரு நிமிடம் நின்று இரசிக்க மறந்த, சின்னச்  சின்ன இரசனைகள் கொண்டு கட்டப்பட்ட நல்ல வரிகள்(புதிய பாடல்) கேட்டுப் பல நாட்களாகிறதே எனத் தோன்றியது. கவிதாயினி  தாமரை/ கவிஞர் மதன் கார்க்கி அவர்கள்  ஏதாவது புதிய பாடல்  வரிகள் எழுதியிருப்பார்கள்  என்று புதிதாக வந்த பாடல்களைக்  கொஞ்சம் தேடிப் பார்த்தேன்.

'கூட்டம்' திரைப்படத்தில் 'இத்தனை தூரம் எப்படி வந்தேன்' என்ற  பாடலைக் கேட்க நேர்ந்தது. ஜேம்ஸ் வசந்தனின், வரிகளை மீறாத  மெல்லிசையில் புதிய வார்த்தைகள் மனதில் எளிதாக ஊடுருவியது. இசை தமிழுக்கு இடையூறாக இருந்தால், வரிகளை மீறினால் அதை ஒருபோதும் ஏற்றுக்கொள்ள முடிவதில்லை. ஹரிச்சரன், சுவேதா மோகன்  குரலும் உச்சரிப்பும் வரிகளுக்குத் துணை.

"கொய்து வந்த பூவின் வாசம்
கைது செய்த கையில் வீசும்"

உறங்கும் நாசி மேலே
தேநீர் வாசம் போலே
மனதின் தூக்கம் போக்கும் இவளின் வாசம்

உறங்கும் நாசி மேலே தேநீர் வாசம் போலே எனும் உவமை அன்றாடம் உணரும் ஒன்று தான். தேநீர் வாசம் உறங்கவிடாமல் தனக்கும் புலன்களுக்குமிடையே ஒரு ஈர்ப்பை நிகழ்த்திக்கொண்டிருக்கும். சாதாரணமாக நம் வாழ்வில் கடந்து வரும் நிகழ்வுகளை உவமானமாகப் பயன்படுத்தும் போது பிடித்துவிடுகிறது.இது மாதிரியான வரிகளை எப்போதும் கவிஞர் தாமரையிடமிருந்து எதிர்பார்ப்பதுண்டு.

"குளிரைச் சூடும் காற்றில்
இதழில் சூடு ஏற்றும்
தேநீர் கோப்பை அது உன் இதழாய் பேசும்"

இந்த வரிகளிலும் அதே ஈர்ப்புத் தான். தேநீர் பொழுதுகளை நேசிப்பவர்களுக்கு அது சார்ந்த எதுவும் பிடித்துப் போகும். அது போல இதுவும் பிடித்துப் போனதோ என்னவோ.

முழுமையான வரிகளுக்கு 


Sunday, April 14, 2013

'தமிழன் விருதுகள்'

புதிய தலைமுறை தொலைகாட்சி ஆரம்பிக்கப்பட்ட காலம் முதல் இன்று வரை, தமிழில் இப்படியொரு ஊடகம் வராதா என்ற ஏக்கத்தை  படிப்படியாக குறைத்துக்கொண்டே வருகிறது. என் எதிர்பார்ப்புகளை மீறி முன்னோக்கிச் சென்றுகொண்டிருக்கிறது. விமர்சனங்களை முன்வைப்பவர்களுக்கு பஞ்சமில்லை. அதை ஆரோக்கியமாக முன்வைப்பவர்களுக்குத் தான் தட்டுப்பாடு. தமிழ் ஊடகங்களில் 'புதிய தலைமுறை' ,தன் பெயருக்கு ஏற்றபடி பல படிகள் முன்னோக்கித் தான் இருக்கிறது. சக தமிழர்களைத் தூக்கிவிடும் ஊடகமாகத் தான் இதைப் பார்க்க முடிகிறது. ஒரு தமிழ் ஊடகம் தான் சார்ந்திருக்கும் சமூகத்தின் தரத்தோடு ஒத்துப்போகாமல், அந்தச் சமூகத்தையும் சேர்த்து அரவணைத்துக்கொண்டு  செல்கிறது என்பது ஆரோக்கியமான விடயம் அல்லவா.


இன்று சித்திரைத் திருநாளை முன்னிட்டு புதிய தலைமுறையில் ஒளிபரப்பான 'தமிழன்  விருதுகள்' நிகழ்ச்சியை  பார்க்கக் கிடைத்தது.  இலக்கியம் ,கலை ,அறிவியல் என்று பல்வேறு துறைகளில் சாதனை படைத்த தமிழர்களுக்கு, தமிழன் விருதுகளை வழங்கி கௌரவித்தது புதியதலைமுறை. ஓர் ஊடகம் கேளிக்கை  நிகழ்ச்சிகளை தவிர்த்து ,சமூகத்துக்கு பயன்தரக் கூடிய விடயங்களை முன்னின்று நடத்தி வெற்றி பெறுவதென்பது ஒரு சாதனை தான். இந்தக் கருத்தைத் தான்  இந்து நாளிதழின் ஆசிரியர் ராம் கூட விருது வழங்கும் நிகழ்வில் முன்வைத்திருந்தார். அதுவும் ஒரு தமிழ் ஊடகமாக இருந்து,சமூகத்துக்கு  பயனுள்ள  விடயத்துக்கு  தமிழ் மக்களிடம் வரவேற்புப் பெறுவது என்பது ஒரு அசாத்தியத் திறன் தான். 

தொழில்நுட்பம், விளையாட்டு ,வணிகம் ,அறிவியல் , சமூக சேவை என அனைத்து துறைகளிலும் முன்னோடியாகத் திகழும் சாதனைத் தமிழர்களைத்  தேர்வு செய்ததோடு, அந்தந்தப் பிரிவில் நம்பிக்கை அளிக்கக்கூடிய இளம் சாதனையாளர்களுக்கும் நம்பிக்கை நட்சத்திரம் விருது வழங்கப்பட்டது. 


அறிவியலில் சாதனை படைத்த தமிழர் சிவதாணு பிள்ளை , நிலமற்ற ஏழை விவசாயிகளுக்காகப்  போராடும் கிருஷ்ணம்மாள் போன்றவர்களுக்கு விருது கிடைத்ததே அந்த விருதுக்குப் பெருமை.  

தரமானவர்களுக்கு , சமூகத்துக்குக்காக உழைப்பவர்களுக்கு  விருதுகளை  வழங்கி ,சமூகத்துக்கு அவர்களை அடையாளம் காட்டும் புதிய தலைமுறையின் இந்த முயற்சி இனி வரும் வருடங்களில் தமிழர்களிடம் ,குறிப்பாக இளைஞர்களிடம்  இன்னும் வரவேற்ப்பு பெற வேண்டும் . 

எந்தச் சமூகம் தன் சமூகத்துக்காக உழைக்கிறவர்களை மதிக்கிறதோ ,அந்தச் சமூகமே மேலும் மேலும் சாதனையாளர்களைப் பெறும். அறிவால்  ஒளியேற்றப் போகிறவர்களை வெளிச்சம் போட்டுக் காட்டும்  திறன் ஊடகங்களுக்கு உண்டு.புதியதலைமுறை  உலகத் தமிழர்கள் எனும் பரந்த வீச்சுக்குள் சாதனையாளர்களை தேடி எடுக்கும் என நம்புகிறேன்.

Sunday, April 7, 2013

நெடு வெண்ணிலாவே ! :குறிஞ்சி : தோழி கூற்று







"கருங்கால் வேங்கை வீயுகு துறுகல்
இரும்புலிக் குருளையிற் றோன்றுங் காட்டிடை
எல்லி வருநர் களவிற்கு
நல்லை யல்லை நெடுவெண் ணிலவே. " - நெடுவெண்ணிலவினார்.

கரிய அடியையுடைய வேங்கை மரத்துடைய மலர்கள் உதிர்ந்த குண்டுக்கல் நிலவொளியில் ,பெரிய புலிக்குட்டி போலக் காணப்படுமாம். அதைப் புலின்னு நினைச்சு தன் தலைவன் அஞ்சுவான் என எண்ணுகிறாள். இது இரவில் திருட்டுத்தனமாக வரும் தன் தலைவனுக்கு  நன்மை தருவதாய் இல்லை என்கிறாள்.

எப்படியெல்லாம் யோசித்திருக்கிறார்கள்! அவ்வளவு காதல் :)

ஆனால் இங்கு 'நெடு வெண்ணிலாவே' என்று கூறுகிறாள். இயல்பாகவே  தனக்குரிய பொழுதில் தான் நிலவு எறிக்கும் .பின் ஏன் நெடு வெண்ணிலாவே என்கிறாள்? 

தன் தலைவனின்  களவொழுக்கத்திற்கு இடையூறாக இருக்கும் வெண்ணிலவை அவள் விரும்பவில்லை. அது விரைவில் மறைய வேண்டுமென விரும்பினாள். அதனால் அதை நெடு வெண்ணிலா என கூறுகிறாள். இந்தச் சிறப்பால் இந்தச் செய்யுளை இயற்றியர் 'நெடுவெண்ணிலவினார்' எனப் பெயர் பெற்றார்.
  உவமைகளைக்  கையாண்டிருக்கும் விதம் பிரம்மிப்பாகவும், இனிமையாகவும் இருக்கிறது. கரிய பாறையையும்,உதிர்ந்த வேங்கை மலர்களையும் இணைத்துப் பயன்படுத்தியிருக்கிறார்.
'வீ ' என்றால் நன்றாக மலர்ந்து வீழ்ந்த /வீழுகின்ற மலர் என்று பொருள். பூவின் ஆறு பருவங்கள் : முகை , அரும்பு ,மொட்டு ,மலர் ,பூ மற்றும் வீ  .

Friday, April 5, 2013

சில்வியா பிளாத் effect


சுருக்கமாகக் கூறினால், மிகச்சிறந்த கவிஞர்களுள் ஒருவராக கருதப்படும் சில்வியா பிளாத், உளவியல் பிரச்சனையால் (மனப்பிறழ்வு - Bipolar disorder ) பாதிக்கப்பட்டு தற்கொலை செய்துகொண்டவர்.சில்வியா பிளாத் பற்றி மேலதிக விபரங்கள்  அறிய ஆர்வமிருந்தால் தேடிப்  படித்துக்கொள்ளுங்கள். எழுத்தாளர்  சுஜாதா 'சில்வியா' என்றொரு நாவலிலும் சில்வியா பிளாத் பற்றிக் குறிப்பிட்டிருப்பார். அந்த நாவலும் இது போன்றதொரு உளவியல் பிரச்சனையோடு தொடர்புபட்டது. 

ஆனால் creativity தொடர்பான ஆய்வுகளின் மூலம் அதிகமாக அறியப்படும் உளவியலாளர்  'James  Kaufman ' என்பவர் 'சில்வியா பிளாத் effect ' எனும் சமாச்சாரத்தை முன்வைத்திருக்கிறார். ஏனைய படைப்பாளிகளை விட பெண் கவிஞர்களே அதிகமாக இது போன்ற உளவியல் பிரச்சனைகளுக்கு உள்ளாகிறார்கள் என்கிறார். 


கூகிள்  செய்ததில் நிறையத் தகவல்கள் கிடைத்தன. ஆன் செக்ஸ்டன் (Anne Sexton) , Amy Levy (அமி லெவி ) , Sara Teasdale  , Alfonsina Storni , Virginia Woolf எனத்  தற்கொலை செய்துகொண்ட பெண் கவிஞர்கள் ஏராளம்.  ஏன் ஓவியர் வான் கோ கூடத்  தற்கொலை செய்துகொண்டவர் தான். பொதுவாகப்  படைப்பாளிகளுக்கே உள்ள உளவியல்ப் பிரச்சனை என வரையறுத்து விட முடியுமா என்ன?


சில்வியா பிளாத்தின் கவிதை எழுதும் பழக்கம் தான் அவரைக் கொஞ்சம் அதிக காலம் உயிரோடு வைத்திருந்திருக்கிறது என்பது சிலருடைய கருத்து.

சில்வியா பிளாத்தின் புகழ் பெற்ற கவிதை 'Daddy'. சில்வியா பிளாத் தன் சொந்தக் குரலில் வாசிக்கிறார். 



 

Saturday, February 23, 2013

கண்ணில் தாகம் தீருமோ !



நீண்ட நாட்களுக்கு முதல் எண்ணங்களில் மெல்லிய வண்ணங்களை   தீட்டிய ஒரு பாடல். இந்தப் பாடலை ஒவ்வொரு முறை கேட்க்கும் போதும் ஏதோ ஒன்றை இரசித்துக்கொண்டே இருக்க முடிகிறது.

 பின்னணி இசை , காட்சியமைப்பு ,வரிகளில் விரகதாபமும் மௌனமும் கலந்திருக்கிறது. உணர்வுகளை சரியாகக் கோர்த்து உருவாக்கப்படும் படைப்புகள் மனதை கொஞ்சம் கனமாக்கிப் பின்  காற்றில் ஆடும் ஒரு இறகு போல் ஆக்கிவிட்டே செல்லும். அந்த விதி இந்தப் பாடலுக்கு பொருந்தும்.

பாடல் வரிகளில் இன்னொரு தனித்துவம் படர்ந்திருக்கிறது. அந்த வரிகளுக்குத்  தன் இனிய  குரலால் அழகு சேர்த்தது பாடகி சௌமியா.  அந்தக் குரலில் இருக்கும்  ஏக்கம் , வேதனை சில வரிகளுக்கு உயிர் கொடுத்திருக்கிறது. கார்த்திக் ராஜாவின் பாடகித் தேர்வு சிறப்பு.

காதலனை /கணவனை நண்பனாக நினைத்துப் பாடுவது போன்ற வரிகள்.இலக்கியங்களில் தோழி என்பது போல , இந்தப் பாடலில் நண்பனாக நினைத்துப் பாடுவது ஒரு தனி அழகு.

// கோபங்கள் பேசும்போது வேதனை கூடும் ப்ரேமைகள் பேசும் போது மோகம் கூடும் //
வடமொழிச் சொற்களும் தமிழும் கலந்து வரும் வரிகள்.  வரிகளின் ஆழமும் அதை இணைத்துக்கொண்டே பயணிக்கின்றது. சொற்களின் தேர்வுகள் ,உணர்வுகளை சரியாக வெளிப்படுத்துதல் என அடர்த்தியான வரிகள்.

//மாமழை நேரங்கள் ஈரமாய் என்னை சேர்பவன் //
காட்சியமைப்போடு பொருந்திய வரிகள் . காதலுக்கான ஏக்கத்தை வெளிப்படுத்தும் வரிகள்.

//பூவின் அசைவினிலே 
ஏதோ ஒரு படபடப்பு //


மிகவும் பிடித்த வரிகள் . காதலி தன் மனநிலையை , உணர்வில் கலந்திருக்கும் ஒரு படபடப்பை வெளிக்கொண்டுவரும் வரிகள். வரிகளில் ஒரு புதுமை.

காட்சியமைப்பே ஒரு கவிதை போல் உணர்வுகளை வடித்திருக்கிறது. வெளியில் மழை , ஜன்னலில்  வழியும் நீர்த்துளிகள் என அனைத்தும் உள்ளே உருவாகும் உணர்வுகளை கரைத்துக்கொண்டு போகிறது.

கார்த்திக் ராஜா எனும் ஓர் அற்புதமான இசையமைப்பாளர் இசையை எங்காவது இருந்துவிட்டு ஒரு சில படங்களில் தான் கேட்க்க முடிகிறது. இருந்தாலும் மனதில் என்றும் சுகமாய் அமர்ந்துகொள்பவை  அந்த இராகங்கள். அது போல் தான் இந்தப் பாடலும் அமைந்திருக்கிறது.



முழுமையான பாடல்

Sunday, February 3, 2013

Life of Pi

கனடாவை சேர்ந்த எழுத்தாளர் Yaan Martel எழுதி Man Booker விருது பெற்ற புத்தகமே 'Life of Pi' . அதே பெயரிலேயே Ang Lee இயக்கத்தில்  திரைப்படமாகவும் வந்திருக்கிறது. அவரின்  Brokeback Mountain  என்ற படத்திற்காக அவருக்கு சிறந்த இயக்குனருக்கான ஒஸ்கார் விருது கிடைத்தது. சிறந்த இயக்கத்திற்கான விருது பெற்ற முதலாவது ஆசிய நாட்டவர்.

Life of Pi திரைப்படமும் பதினொரு ஒஸ்கார் விருதுகளுக்கு பரிந்துரைக்கப்பட்டுள்ளது . அதில் பாம்பே ஜெயஸ்ரீ பாடிய தமிழ்ப் பாடலும் ஒன்று.


ஆரம்பத்திலேயே பாம்பே ஜெயஸ்ரீயின் குரல் பின்னணியில் ஒலிக்க விலங்குகளின் நடத்தையை அழகாக படமாக்கி இருக்கிறார்கள். 'கண்ணே கண்மணியே " என்ற தமிழ்ப்பாடல் நகரத்துக்கு வாழ்க்கையிலிருந்து எம்மை மெல்ல அந்நியப்படுத்தி இயக்குனரின் உலகை அறிமுகப்படுத்துகிறது. மனதுக்கு ஓர் இனிய தாலாட்டு.எழுத்துகளை காட்டுவதில் கூட அவ்வளவு கவனம் செலுத்தியிருக்கிறார்கள். விலங்குகளின் நடத்தையே எழுத்தின் வடிவையும்  தீர்மானிக்கிறது.

தற்போது கனடாவில் வாழ்ந்து வரும் பை (Piscine Molitor) தனது கதையை ஆரம்பத்திலிருந்து சொல்ல ஆரம்பிக்கிறான் . பாண்டிச்சேரியில் இருந்து ஆரம்பிக்கிறது கதை . 
அனைத்து மதங்கள் மீதும் ,கடவுள் மீதும் நம்பிக்கை கொண்டவன் பை .அவனுக்கு முதலாவதாக கிடைத்த அறிமுகம் கிருஷ்ணா. அதிலிருந்தே அவனது தேடல் ஆரம்பிக்கிறது. இரண்டாவதாக இயேசுவினுடைய அறிமுகமும் அவனுக்கு கிடைக்கிறது. எல்லா கடவுளையும் ஏற்றுக்கொள்ளும் அவனது மனப்பான்மைக்கு அவன் சொல்லும்  "Thank you Vishnu, for introducing me to Christ." போன்ற  சில வசனங்களை சொல்லலாம் .

தந்தை ஒரு மிருகக் காட்சி சாலை நடத்துகிறார். தாயார் ஒரு 
botanist. ஆனால் இவர்கள் பேசிக்கொள்ளும் தமிழ் தான் கொஞ்சம் உறுத்தல் . இவர்கள் கனடாவுக்கு புலம்பெயர முடிவு செய்து விலங்குகளை ஏற்றிக்கொண்டு கப்பலில் புறப்படுகிறார்கள் . பிலிப்பைன்ஸ் அருகே சென்றுகொண்டிருக்கும் போது கப்பல் புயலில் சிக்க பையும்,ஒரு ஓநாயும், வரிக்குதிரையும், ஒரு ஒருங்குட்டானும், ரிச்சர்ட் பார்கர் எனும் புலியும்  தப்புகின்றன . ஏனைய விலங்குகள் இறந்துவிட புலியும்  பையும்  மட்டுமே இறுதில் எஞ்சுகின்றனர் .பசுபிக்கடலின் நடுவே  தனியான ஒரு படகில் எப்படி அந்தப் புலியுடன் தன் நாட்களை கழிக்கிறான் என்பதே மிகுதிப்பகுதி .



இந்தக் கதையை சொல்லியிருக்கும் விதத்திலும்  திரைக்கதையை நகர்த்தும் விதத்திலும் தான் ஆங் லீயின் இயக்கம் தனித்து தெரிகிறது . இதில் இறுதிவரை புலியின் குணத்தை மாற்றாது யதார்த்தமாக அப்படியே கொண்டுசென்றதில் தான் அந்தத் திரைக்கதையின் நேர்த்தியும் வெற்றியும் தங்கியிருக்கிறது.


புலியிடமிருந்து தன்னையும் காப்பாற்றிக்கொண்டு , அதையும் காப்பாற்ற உணவளிப்பது என்பதில் அன்பின் தொடர்பாடல் வலுக்கிறது. விலங்குகளுக்கும் உணர்வு உண்டு , ஆன்மா உண்டு என சின்னவயதிலிருந்தே நம்புபவன். புலி அவனை பார்க்கும் சந்தர்ப்பங்களில் எல்லாம் அதன் கண்களை காட்டும் காட்சி ஒன்றே போதும், அவனது நம்பிக்கை நம் நம்பிக்கையாகி போகும் சந்தர்ப்பம் அது.



ஒரு சில காட்சிகளில் மட்டுமே வரும்  ஷிராவந்தி சாய்நாத் அழகாய் தெரிகிறார் . வியர்வையோடு நடனமாடும் இடங்களில் அவ்வளவு அழகு. நம் தமிழ் சினிமாவில் பாலுமகேந்திரா காட்டிய அழகை Claudio Miranda வும் அழகாகவே காட்டியிருக்கிறார். சில காதல் காட்சிகளே வந்தாலும் ,  மிகவும் அழுத்தமானவை.


இதை ஒரு உயிருள்ள படைப்பாக வெளிக்கொண்டுவருவதற்கு அனைவரும் மிகவும் இரசித்து உழைத்திருக்கிறார்கள் . ஒளிப்பதிவாளர் 
Claudio Miranda ,Michel Danna வின் பின்னணி இசை, பையின் நடிப்பு  என்பவற்றை குறிப்பிட்டு சொல்லலாம் .

எவ்வளவு தான் அன்பு காட்டினாலும், பழக்கப்படுத்தினாலும் புலி காட்டை கண்டவுடன் பையை விட்டு காட்டை நோக்கி ஓடிவிடும். புலி தன்னை திரும்பிக் கூட பார்க்கவில்லை என பை உருகும் காட்சியில் சிறப்பாக நடிப்பை வெளிப்படுத்தியிருக்கிறார்.ஆனால் காட்டை கண்டவுடன் ஓடியது  புலியின் இயல்பு.அன்பு செலுத்தியது அவனின் இயல்பு. 


"புலி இல்லாவிட்டால் நான் என்றோ இறந்திருப்பேன். என்னுடைய பயம் தான் என்னை எப்போதும் விழிப்புடன் வைத்திருக்கிறது "

"Hunger can change everything you thought you knew yourself! " 

"All of life is an act of letting go but what hurts the most is not taking a moment to say goodbye. " 
என நிறைய வசனங்களை எடுத்துக்காட்டலாம். இந்தப் படத்தின் கதாப்பாத்திரங்களின் தன்மைக்கு வலுச்சேர்ப்பதில் வசனங்களின் பங்கும் முக்கியமானது.  

இறுதிவரை பிரிவுகளையே சந்தித்தும் , நம்பிக்கையை பற்றிப்பிடித்திருக்கும் ஓர் இளைஞன் பை.Life of pi திரைப்படம் மெல்ல நுழைக்க முயலும் தேடல் ஒரு நல்ல அனுபவம் .