கங்குபாய் கத்தியவாடி

நாம் எதையெல்லாம் விரும்பிச் செய்கிறோமோ அதன் மீது மரியாதையும் ஒருவிதமான பிடிப்பும் நமக்கு இருக்கவேண்டும். அதில் காமம் மட்டும் விதிவிலக்கல்ல.

காமம் தந்து , உடல் தந்து, தானும் மகிழ்ந்து இன்னோர் உயிரை மகிழ்விப்பவரும், காதல், அன்பு, உள்ளமெலாம் உருக்கி உடலாய்த் தந்து மகிழ்விப்பவரும், இரண்டையும் ஒன்றாய்த் தந்து மகிழ்விப்பவரும் மதிக்கப்பட வேண்டியவர்கள். அவர்கள் ஆணாய் இருந்தாலும், பெண்ணாயிருந்தாலும், மாற்றுப் பாலினத்தவராக இருந்தாலும் மதிக்கப்படவேண்டியவர்கள்.

இந்த மதிப்பானது, உள்ளப் புரிதலினாலும், மனிதத்தினாலும், தகுந்த புத்தியினாலும், பெற்றுக்கொண்ட விஸ்தாரமான அறிவினாலும், நடத்தையினாலும், வார்த்தையினாலும் உள்ளுக்குள்ளே நிகழும் மாற்றத்தினாலும் எழவேண்டும்.

கங்குபாய் என்கிற இந்தப் படம், விலைமாதர்களின் வாழ்வியலைப் பேசுகிறது. விலைமாதர்கள் வெவ்வேறு தரத்தில் இருக்கிறார்கள். ஒவ்வொரு பெறுமதிக்கு ஏற்றபடி ஒவ்வொரு தரத்தில் இருக்கிறார்கள். நன்கு படித்து வேலைபார்க்கும் விலைமாதர்களும் இருக்கிறார்கள். பகுதியாய் விலைமாதராக இருப்பவர்களும் இருக்கிறார்கள்.

இப்போதும் அப்போதும், விலைமாதர்கள் வெவ்வேறு தரத்தில் இருந்தாலும், கங்குபாய் என்கிற இந்தப் படம், காமாத்திபுரா என்கிற இடத்தில் 1960 களில் நிகழ்ந்த கதையை மையமாக வைத்து புனையப்பட்ட கதை. கங்குபாய் கத்தியவாடி என்கிற பெண்ணின் கதையை மையமாக வைத்து எடுக்கப்பட்ட கதை.

பெரும்பாலும் இதுபோல விலைமாதர் விடுதிகளில் சட்டங்கள் இல்லை. அங்கு விலைமாதர்களாக இருக்கிறவர்களுக்கு தகுந்த வசதிகள் இல்லை. அப்போது, குறிப்பிடட ஒரு பகுதியிலேனும் சட்டபூர்வமாக்கப் படாததால் அவர்களுக்கு தகுந்த பாதுகாப்பும் இருக்கவில்லை. இதையெல்லாம் எதிர்த்து தங்களுக்கும் தகுந்த அங்கீகாரம் வேண்டுமென்று போராடியவர் கங்குபாய் கத்தியவாடி.

இப்பொழுதும் தனிநபர் விலைமாதராக இருப்பது சட்டவிரோதம் இல்லையென்றாலும், இலங்கை இந்தியா போன்ற நாடுகளில், பெரும்பாலான இடங்களில் விடுதியாக வைத்து(Brothel house) நடத்துவது தடை செய்யப்பட்ட ஒன்றாகவே இருக்கிறது. அப்படியிருக்கையில் விலைமாதர் பாதுகாப்பும், அவர்களுக்குரிய சட்டங்களும் இன்னமும் சவாலான ஒன்றாகவே இருக்கிறது.

அவர்களுடைய தொழிலையும் பிற தொழிலுக்குச் சமமான தொழில்களில் ஒன்றாகக் கருதி அவர்களுக்கு சமூகத்தில் அங்கீகாரம் பெற்றுத்தருவது சவாலான ஒன்றாகவே இருக்கிறது. சஞ்சய் லீலா பன்சாலி இயக்கி, அலியா பட் நடித்து வெளியாகியிருக்கும் இந்தப் படத்தில், அலியா பட் மிக அழகாக நடித்திருக்கிறார். கண்ணுக்கு விருந்து தரும் காட்சியமைப்பு மற்றும் இசையென்று அழகாக எடுத்திருக்கிறார்கள்.

தருவது உடலென்றாலும் உள்ளமென்றாலும் அதற்குரிய மரியாதையை அவரவர்களுக்கு தந்து, தாமும் அதுபோல நடந்துகொள்ளும் கலாச்சாரம் இன்னும் வளரவேண்டும். செக்ஸின் அத்தனை சுகத்தையும் விலைமாதரிடம் அனுபவிப்பவர் எல்லோரும் அவர்களுக்கு மரியாதை தருவதில்லை. உழைப்புக்கு மரியாதையை இல்லை. அதுபோலவே, விலைமாதர்கள் வெவ்வேறு தரத்தில் இருப்பதால் அவர்களை வந்து சேருகிற மனிதர்களும் வெவ்வேறு தரத்தில் இருக்கிறார்கள். தரம் வெவ்வேறு ஆனாலும், மனிதரின் புரிதல் மாறாமல் நிறைய விடயங்களை மாற்றமுடியாது.

பெரும்பாலான மனிதர்களைப் போய்ச்சேரும் சினிமா ஊடகம் இந்தளவுக்கேனும் ஒரு கதையைப் பேசுவது மகிழ்ச்சி